ခါတမန်နဗီယီးန်နှင့် ကျွန်ုပ်တို့၏ယုံကြည်ချက် အပိုင်း(၆-၂)

သာဓက အမှတ် (၈)
တမန်တော်မြတ်ကြီး(ဆွ) သည် အလင်းပေးသောမီးတိုင် (သူရိယနေမင်းကြီး) ပမာတည်း။

အာယတ်တော်လာရှိထားသည်မှာ။

''အို နဗီတမန်တော်မြတ် ငါတို့သည် အသင် (တမန်တော်) အား ဤသို့သော အဖြစ်နှင့် စေလွှတ်တော်မူပေ၏။ အသင်သည် (ကမ္ဘာ လောက၏) သက်သေတော်လည်း ဖြစ်၏။ (သက်ဝင်ယုံကြည်သူတို့ကို) သတင်းကောင်းပေး သူလည်း ဖြစ်၏။ ထို့ပြင် (မယုံကြည်သူတို့အား) သတိပေးနှိုးဆော်သူလည်းဖြစ်၏။ ထိုမှတပါး အလ္လာဟ်၏ အမိန့်တော်ဖြင့် ထိုအရှင်၏ ဘက် တော်သို့ ဖိတ်ခေါ်သူနှင့် ထွန်းလင်းတောက်ပသော နေမင်း အဖြစ်ပြု၍ (စေလွှတ်တော် မူခြင်း ဖြစ်၏)။ (၃၃ း ၄၆ - ၄၇)။

သတိမူလျင်ကြိုပင် မြင်နိုင်၏ဟူသော စကားကဲ့သို့ပင် သတိတရား လက်ကိုင်ထား၍ မြတ်ကုရ်အာန်ကို ဖတ်ရှုကျင့်မူလိုက်နာသော 'မို့အ်မင်' တစ်ဦးအဖို့ 'ခါတမန်နဗီယီးန်' အာယတ်တော်၏ ရှေ့ပိုင်း (၃၃ း ၈) တွင်လည်း တမန်တော်မြတ်၏ နှောင်းပိုင်းတွင် တမန်တော်ပွင့်ပေါ်နိုင်စရာရှိသည့် အကြောင်း သိစေနိုင်သည့် အာယတ်တော်ကို ဖော်ပြထားခဲ့ပြီး ယခုတစ်ဖန် ဤအာယတ် (၃၃ း ၄၆ - ၄၇) တွင်လည်း ကိုယ်တော်မြတ်(ဆွ) အား 'ဆီရာဂျန်(န်)မူနီးရ်' လင်းဝင်းတောက်ပသော ဆီမီးခွက်၊ ထွန်းလင်း တောက်ပသော သူရိယနေမင်းဟူ၍ဖော်ပြတော်မူလျက် -

၁။ သူရိယနေမင်းဟု အနက်ယူလျှင် ကိုယ်တော်မြတ်ထံတော်မှ အလင်းကို ခံယူလျက် ကမ္ဘာလောကတဝှမ်းလုံးသို့ ရောင်ပြန်ဟပ်သော သဘောဖြင့် အလင်းရောင်ဖြန့်ဖြူးမည့် ပုဂ္ဂိုလ်များသည် ကိုယ်တော်မြတ်၏ 'အွမ္မသ်' တွင် အစဉ်ထာဝရ ရှိနေဦးမည် ဖြစ်ကြောင်းနှင့် လစန္ဒာသည် နေမင်းကြီး၏ ကိုယ်ပိုင်အလင်းကို ခံယူလျက် ညဉ့်၏အမှောင်ထု ဖုံးလွှမ်းမှုကို ရောင်ပြန်ဟပ်ကာ အလင်းပေးသည့်ပမာ ရှိနေမည် ဖြစ်ကြောင်းကို သိရှိနိုင်ပါသည်။ (ရှေ့တွင် တင်ပြပြီးဖြစ်သည့် 'ခလီဖာရာထူးရ တမန်တော်' များကို သုံးသပ်လျှင် နားလည်နိုင်ပါသည်။)

၂။ 'ဆီရာဂျ်' ကို ဆီမီးအိမ်(ခွက်)ဟု အနက်ယူလျှင်လည်း ဆီမီးအိမ် တစ်ခုကို မီးထွန်းညှိခြင်း ခံရပြီး လင်းဝင်းတောက်ပခဲ့ပြီးလျှင် ထိုဆီမီးအိမ်မှ ရာထောင် အသောင်းမကသော ဆီမီးအိမ်များကို မီးကူးယူ ထွန်းညှိနိုင်ပေတော့သည်။ ထို့ပြင် ဤသို့ မီးကူးထွန်းညှိလေသောကြောင့် မူလ ဆီမီးအိမ်မှ မီးတောက်တွင် မည်သို့မျှ လျော့နည်းသွားခြင်း မရှိကြောင်းကို သုံးသပ်ပါက ကိုယ်တော်မြတ်၏ နောက်ပိုင်း၌ 'အွမ္မသ်' အတွင်းမှ 'အွမ္မသီနဗီ' ပေါ်ထွန်းရခြင်းကြောင့် ကိုယ်တော်မြတ်၏ ဂုဏ်မညှိုးရုံသာမက ဂုဏ်ဒြပ်တသီတင့်၍ ထွတ်မြတ်ခြင်းကိုသာ ဆောင်ရမည်ဖြစ် ကြောင်းနှင့် တပည့်နောက်လိုက်များပြားလေ ဆရာသမား၏ ဂုဏ် ကြီးမြင့်သည်ထက် ကြီးမြင့်လေသာဖြစ်ခြင်းကို ပမာပြုဆင်ခြင်နိုင်ပါသည်။ (အေမာမ် အဟ်မဒ်အလ်ဆွာဝီက ဂျလာလိုင်းအောက်ခြေ ရှင်းလင်းချက်၌ 'ဆီမီးခွက်' ဖြင့် တင်စားလျက် ရှင်းလင်းဖော်ပြထားသည်ကို အခန်း (၃) စာ ၂၂၄ တွင် ရှုပါကုန်)

ဤကဲ့သို့ပင် အရေးပါ၍ အဓိပ္ပါယ်နှစ်ခွဖြစ်စေနိုင်မည့် အကြောင်းကိစ္စ တစ်ရပ်ရပ်ကို ကုရ်အာန်ကျမ်းတော် မြတ်တွင် ဖော်ပြခဲ့ပါလျှင် ထိုအကြောင်းကိစ္စကို အခြားမြောက်မြားလှစွာသော ကဏ္ဍများတွင် ထပ်ခါထပ်ခါ ဖော်ပြ ရှင်းလင်းကြောင်းနှင့် စပ်လျဉ်း၍ အရှင်မြတ်က ဤသို့ မိန့်ထားတော်မူပါသည်။

''We have explained the truth in this Qur’an in the various ways that they may be admonished, but it only increases them in aversion.'' (17:42)

ဤမျှသာ မဟုတ်သေးဘဲ အခြားတစ်နေရာတွင်လည်း ကုရ်အာန်ကျမ်း တော်မြတ်ကို မည်သို့ဖွဲ့စည်း၍ အမှားအယွင်း တစ်စုံတစ်ရာမျှ ထိုးဖောက် မဝင်ရောက်နိုင် စေရန်အတွက် လုံလုံခြုံခြုံ ကာကွယ်စောင့်ထိန်းထားတော်မူကြောင်းနှင့် စပ်လျဉ်း၍ လည်း ဤသို့ မိန့်ထားတော်မူပါသည်။

''အမှားသည် ယင်း(ကုရ်အာန်ကျမ်းတော်) ၏ ရှေ့ဘက်မှလည်းကောင်း၊ အနောက်မှလည်း ကောင်း၊ ဝင်ရောက်စွက်ဖက်နိုင်ခြင်း မရှိချေ။ ယင်း(ကုရ်အာန်) သည်ကား ကြီးကျယ်လှစွာသော အမြော်အမြင် ရှိတော် မူသည့် အရှင်၏ အထံတော်မှ ချပေးတော်မူလေသည်။ " (၄၁ း ၄၃)

ဤသို့လျှင် အလ္လာ့ဟ် မုက္ခပါဌ်တော် လာရှိထားသည်နှင့်အညီ 'ခါတမန် နဗီယီးန်' မုက္ခပါဌ်တော်နှင့် စပ်လျဉ်းပြီး (နှောင်းမွတ်စလင်တို့အနေနှင့်) မိမိတို့၏ အထက်ကျော်ကာရီက ရှိခဲ့ကြသော အမျိုးသားတို့သည် ယင်းတို့၏ တမန်တော်ကြီး များအား 'အန္တိမ နောက်ဆုံးစွန်သောတမန်တော်၊ ဤတမန်တော်၏ နောက် နောက်ထပ် တမန်တော်ဟူ၍လားလားမျှ မပေါ်ထွန်းနိုင်တော့ပြီဟု ဆိုခဲ့ကြသည့်အလား၊ အထင် အမြင်မှား၍ မိမိတို့၏ တမန်တော်မြတ်(ဆွ)ကိုလည်း 'နုဗူဝါတ်ကို အဆုံးသတ်သူ' 'နောက်ဆုံးစွန်သော တမန်တော်' စသည်ဖြင့် မှားယွင်းစွာ သဘောပေါက်ပြီး အဓိပ္ပါယ် ပြန်ဆိုမှု မမှားကြစေခြင်းအလို့ငှာ ဤသည့် ''ခါတမန်နဗီယီးန်'' အာယတ်တော် ပါရှိသော ဆူရာဟ်(ကဏ္ဍ)၌ပင် ရှေ့ပိုင်းမှ လည်းကောင်း၊ နောက်ပိုင်းမှ လည်းကောင်း ရှင်းလင်းချက်ကို ဖော်ပြထားတော်မူခဲ့ခြင်း ဖြစ်ပေသည်။ (ဥပမာ- ကုရ်အာန် (၉၁း၂-၃-၄) လည်းရှု)

ခါတမန်နဗီယီးန်နှင့် ကျွန်ုပ်တို့၏ယုံကြည်ချက် အပိုင်း(၇-၁)